سبع ساعات اسولـف واتكلـم واستخـف دمـي



وهي تسمعني وتضحك ومبسوطه علـى الأخـر



سبع ساعات اعلمها عن احزانـي وعـن همـي



واسولف عن حكايا الطفل كان وصار هالشاعـر



سبع ساعات تتساقط حروف الصدق مـن فمّـي



على صحرا مسامعهـا سحـاب العشـق متناثـر



سبع ساعات وتحلف لي براس العشـق وتسمـي



تقول انت الوحيد اللـي ملكنـي حبـك الساحـر



سبع ساعات ونادتني بأسمـه مـا هـو بأسمـي



تنادينـي فهـد واسمـي انـا ياللاسـف جابـر



تشنج كل شـيٍ كـان حولـي ومسمعـي يدمـي



ركز خنجر فهد في مسمعي من صوتهـا الخـادر



تخدّر فكـري وجسمـي وذاب بداخلـي عظمـي



وصرت اسمع صدى صوتٍ يردد غلطة الشاطـر



يردد غلطة الشاطـر بعشـرة واقعـي وحلمـي



وترددهـا زوايـا غرفتـي والواقـع الـغـادر



كثير اصوات شقت جلدي اللي يحتضـن عظمـي



وصراخ البـاب والـدولاب والشبـاك والساتـر



وونـات القلـم والدفتـر اللـي يلتفـت يـمـي



وخايف وش ابي اكتب بوسطه من هنـا لـباكـر



وكانت ساكته وصوت النفس من خشمها و خشمي



ربع ساعه وبحة صوت قالت: خير وش صايـر



وطرا في بالي عبدالله وخالـد واحمـد ونشمـي



ولآخرهم فهـد تسعـه وانـا مدموغـه العاشـر



وقلت ابداً مغير الخيـر ولكـن امسحـي رقمـي



اكيد انه فهد جالس سبع ساعـات وهـو ناطـر



وقالت لي: رجـاءً او اقولـك.. طيـر ياعمـي



مسوي حضرتك في هالزمان العاشـق الطاهـر



وقالت لي: اقول! وقلت: انـا بقـول وذا علمـي



عجب هالناس وش هالناس تخطي وبالخطى تكابر



انا يابنـت بنثـر لـك حياتـي واجمعـي لمّـي



بعضه بنثره في مسمعك هالحيـن ومـن خاطـر



ترا عمري انا تسعـه وعشريـن وكـذا رسمـي



ولكـن عشـت ايامـي دبلهـا مقبـل وعـابـر



اصيل وكـل اصيـلٍ مايبـي مدحـي ولا ذمـي



وسبع انعام في هالناس اخـص الحامـد الشاكـر



انا من نجد وربعي هم عتيبـه وخالـي الدحمـي



وبرقا لحمي ودمي وانا مـن روق ومـع ناصـر



انا جابر ولد هايف وسلـم الطيـب هـو سلمـي



ابـو الـي مربينـي علـى الجـزلات واتفاخـر



انـا راعـي مجاهيـمٍ يشـع بفخذهـا وسمـي



وراعي خيل وراعي بير وبيـتٍ مبغضـه كافـر



على الرمضى ابت رجلي بأرضٍ عاشقه ضمـي



وشمسٍ تشرق وتوقف على راسي وانـا صابـر



عرق وجهي يصب وامسحـه بشماغـي وكمـي



وألد عيوني عن نـاسٍ سرقنـي يمهـا الناظـر



وانا شاعر ولو اكتب عجز كل فكر فـي نظمـي



ولاني بالغـرور احكـي ولكـن واثـق وقـادر



وانـا رجـال هـاوي للقمـم ويقودنـي عزمـي



وابي ارقى على راس الجبل وانتي مـع الحـادر



عرفتي ليه انـا طاهـر؟ لانـك همـي وغمـي



ولان الدنيا فـي عينـي جبـل نرقـاه ونغامـر



يابنت الناس شفتي كيف بليّـا سـلاح مانرمـي



ولا نوقـف بوجـه البنـدق المليـان ونخاطـر



خلقنـا الله بشـر بعقـول وذا واقـع وذا وهمـي



وكـلٍ يتبـع مـراده وفينـا رابـح وخـاسـر



وقالت لي فمان الله شعلـت النـار فـي جسمـي



فمـان الله يالطاهـر ومثـلـك قـلـه ونــادر



ورحت آخذ كتاب الله واحلـف بالكتـاب:" امـي



لو ان اسمي فهد بالله ماكان احلى من جابـر..!!؟




****
اتمنى تعجبكم وماتكووون مكرره ولاتحرموني ردودكم.............